Храм Святителя Николая

+7 (962) 551-56-66

Преподобный_Григорий_Декаполит.JPG

 

Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Умерщвле́нную сластьми́ телесе́, смире́нную мою́ ду́шу твои́ми моли́твами оживи́, блаже́нне Григо́рие: жи́знь бо ны́не прия́л еси́ нестаре́ющуюся, умертви́в я́же на земли́ у́ды, преподо́бне, по́стническими по́двиги.

Удержа́в сла́сти теле́сныя ума́ чистото́ю, из млада́го, о́тче, во́зраста орга́н Ду́ха бы́л еси́, Того́ де́йства све́тло прие́мля и богови́ден познава́яся.

Жела́нием Боже́ственным пло́ти жела́ния увяди́л еси́, и тебе́ самому́, блаже́нне, обручи́л еси́ супру́жницу — чистоту́, из нея́же ча́да тебе́ роди́шася — вся́ доброде́тели, присносла́вне, ча́до тя́ Бо́жие соде́ловающия.

Богоро́дичен: От земли́ до небе́с дося́жущи ле́ствица небе́сная, е́юже Бо́г Сло́во земны́м сни́де, Благослове́нная Пречи́стая, несказа́нное чу́до, недомы́сленное виде́ние, спаси́ к Тебе́ прибега́ющия.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Доброде́телей на го́ру восте́к, преподо́бне, во мра́к виде́ния вше́л еси́ и, разуме́в, ели́ко вмести́л еси́ Непости́жнаго естество́м, просвеще́ния испо́лнен, о́тче, бы́в.

Рожде́нный в верте́пе за земны́х избавле́ние, дре́вле тя́, в верте́пе, всеблаже́нне, живу́ща, све́том озари́ небе́сным, я́ко Па́вла, светоза́рна показу́я тя́, о́тче Григо́рие.

Небе́сная две́рь, Христо́ва Пречи́стая Ма́ти, прило́ги тя́ де́монскими окружа́ема, о́тче, впери́ и мо́щна кре́постию на ни́х соде́ла Ду́ха благода́тию.

Богоро́дичен: Ра́дуйся, еди́на, ро́ждшая вся́ческих Го́спода; ра́дуйся, жи́знь челове́ком исхода́таившая; ра́дуйся, осене́нная и несеко́мая горо́, ве́рных утвержде́ние; ра́дуйся, Всенепоро́чная.

Седа́лен, гла́с 4.

Боже́ственною све́тлостию озаря́емь, мра́к изгна́л еси́ душетле́нных страсте́й, Григо́рие прему́дре, взя́тся к безстра́стия чисте́йшей высоте́, возсия́л еси́ пресла́вно врачева́ний зари́, всели́вся в незаходи́мый све́т Ца́рствия Христо́ва.

Сла́ва, и ны́не: Восхвали́те, де́вы, ма́тери, предпра́зднуйте, лю́дие, славосло́вите, свяще́нницы, благослови́те Пречи́стую Ма́терь Бо́жию: пло́тию бо младе́нствующи пре́жде, во хра́м принесе́ся, я́ко хра́м Бо́жий святе́йший. Те́мже пра́здник соверша́юще духо́вный, воспое́м Ю, я́ко Предста́тельницу ро́да челове́ческаго.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

На́с ра́ди стра́нным соше́ствием бы́в, Григо́рие, стра́нен благосты́нею, тебе́ Его́ ра́ди стра́нна ви́дев, от оте́чества бы́вша прия́т и Боже́ственна насле́дника Своего́ Ца́рства, доброде́тельми укра́шена, соде́ла.

За Христа́, на́с ра́ди младе́нствовавшаго, и о́трока, преподо́бне, бы́вша, отроко́в учи́лищу вда́л еси́ тебе́ сама́го, младе́нец зло́бою, богому́дре о́тче, бы́в, и боже́ственным смире́нием вра́жию зло́бу смири́л еси́, блаже́нне Григо́рие.

Ту́чами твои́х сле́з, о́тче Григо́рие, я́коже росо́ю Боже́ственною, напая́емь, вся́ку возрасти́л еси́ доброде́тель, вся́кое благопло́дие пра́вды процве́л еси́, я́ко дре́во плодоно́сное, при исхо́дищах во́д насажде́н соверше́ннаго по́стничества.

Богоро́дичен: Ма́ти Бо́жия, Благослове́нная, Всенепоро́чная, души́ моея́ я́звы исцели́, сла́сти утоли́ плотски́я, омраче́нное се́рдце мое́ просвети́, умири́ у́м мо́й и вся́каго вре́да, и вра́жиих мя́ напа́стей изба́ви.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Де́ланием словесе́ лоза́ показа́лся еси́ плодоно́сна, преподо́бне, доброде́телей зре́лыя и велича́йшия принося́щая гро́зды, спасе́ния вино́ духо́вное точа́щия, о́тче, и ве́рных сердца́ веселя́щее.

Сла́вный Ри́м, о́тче, от восто́ка тя́ свети́льника незаходи́ма прие́м ве́рою, просвети́ся честны́ми твои́ми дарова́нии: Христа́ бо име́л еси́ в души́ я́ко све́т, ви́дящия тя́, о́тче, озаря́юща.

Ползя́щаго зми́я и наблюда́ющаго твою́ пя́ту, Григо́рие, бо́дростию боже́ственною в путе́х жи́зни ходя́ я́ко Бо́жий уго́дник, я́ко за́поведей Христо́вых де́латель, умертви́л еси́ си́лою Ду́ха.

Богоро́дичен: Предста́тельнице ми́ра, Ма́ти Присноде́во, Ты́ мя окорми́, и путево́дстви мя́ на пра́вый пу́ть, и напра́ви к пра́вды стезя́м пра́вым помышле́ние мое́, души́ ше́ствия исправля́ющи.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Ма́нием е́же к Бо́гу обожа́емь, свяще́ннейше, виде́нии та́инственными и Боже́ственными осия́нии я́ко проро́к боже́ственный, я́ко Бо́жий уго́дник сподо́бился еси́ Бо́жия благода́ти.

Молчали́во твою́ жи́знь соверши́л еси́, богодухнове́нне, мяте́жей жите́йских яви́лся еси́ бо́льший, и страсте́й вы́шший, и земли́ всея́ стра́нен же и пришле́ц.

Я́ко зерца́ло чи́стое, Боже́ственною заре́ю обогати́лся еси́, я́ко сосу́д свяще́нный, хра́м украси́л еси́, го́рнюю, Григо́рие, и перворо́дных Це́рковь просвети́л еси́.

Богоро́дичен: Мари́е, чи́стая пала́та Царе́ва, бы́вша мя́ разбо́йником нечи́стый верте́п, моли́твами Твои́ми очи́стивши, из Тебе́ ро́ждшемуся хра́м свя́т покажи́.

Конда́к, гла́с 3:

Све́тлое тя́ со́лнце Це́рковь познава́ет, доброде́телей красота́ми и исцеле́ний луча́ми все́х просвеща́я, Христо́в уго́дниче: те́мже пра́зднуем честну́ю па́мять твою́ и почита́ем по́двиги твоя́, всеблаже́нне о́тче прему́дре Григо́рие.

Сла́ва, и ны́не: Восхвали́те, де́вы, ма́тери, предпра́зднуйте, лю́дие, славосло́вите, свяще́нницы, благослови́те Пречи́стую Ма́терь Бо́жию: пло́тию бо младе́нствующи пре́жде, во хра́м принесе́ся, я́ко хра́м Бо́жий святе́йший. Те́мже пра́здник соверша́юще духо́вный, воспое́м Ю, я́ко Предста́тельницу ро́да челове́ческаго.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Сле́з пролия́ньми греха́ о́гнь погаси́л еси́, безстра́стия же во́ду и врачева́ний чи́стое пи́во песнопою́щим то́чиши, Григо́рие: благослове́н Бо́г оте́ц на́ших.

Пла́менною колесни́цею, честны́я любве́ соверше́нием носи́мь, к высоте́ возше́л еси́, в не́йже стяжа́л еси́ твое́, богому́дре, житие́, зовы́й: благослове́н Бо́г оте́ц на́ших.

Страсте́й успи́л еси́ треволне́ния бо́дренными стоя́ньми: усну́в же сно́м, пра́ведным подо́бно, к Све́ту преше́л еси́ Невече́рнему, зовы́й: благослове́н Бо́г оте́ц на́ших.

Богоро́дичен: Ме́ртва бы́вша грехо́м и погиба́юща, Жи́знь ро́ждшая, Чи́стая Де́во, оживи́ и спаси́ мя и гее́нны исхити́, пою́щаго: благослове́н Бо́г оте́ц на́ших.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Твои́ми к Бо́гу мольба́ми терпели́вно де́я, прия́л еси́, всеблаже́нне, ве́рою проси́мое: но́щию бо спя́щу, яви́вся тебе́ а́нгел, ме́чь пла́менный вдаде́, стра́сти се́рдца отсека́ющь, и огне́м тя́ невеще́ственным очища́ющь, и сла́вою просвеща́ющь неизрече́нно.

Всесве́тлое я́ко со́лнце, разу́мно возсия́л еси́ све́том доброде́телей светоза́рно, Григо́рие, чуде́с же сия́ньми озаря́я всю́ зе́млю и просвеща́я благоче́стно песнопою́щия: де́ти, благослови́те, свяще́нницы, воспо́йте, лю́дие, превозноси́те Христа́ во ве́ки.

А́нгельскаго песнопе́ния слы́шав, Григо́рие, еще́ ходя́ в ме́ртвеннем твое́м телеси́, от него́же чу́вствия твоя́ душе́вная я́ве наслади́в, и богови́ден, и светоза́рен позна́лся еси́, зовя́ Влады́це: де́ти, благослови́те, свяще́нницы, воспо́йте, лю́дие, превозноси́те Его́ во ве́ки.

Богоро́дичен: Судию́ и Го́спода па́че сло́ва ро́ждшая, Того́ я́ко Сы́на Твоего́, Всесвята́я, умоли́ в ча́с суда́, осужде́ния, и огня́, и тмы́ несве́тлыя, и скре́жета зубо́в изба́вити ве́рою благоче́стно песнопою́щия: свяще́нницы, воспо́йте, лю́дие, превозноси́те Его́ во ве́ки.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

По́ты по́стническими греха́ угаси́л еси́ у́глие и с небесе́ я́ве огня́ в ви́де благода́ть прия́л еси́, не попаля́ющую, му́дре, но па́че ороша́ющую и кре́постию тя́ си́льна на стра́сти показу́ющую.

Я́ко ши́пок, в по́стнических, о́тче, процве́л еси́ удо́лиих, Григо́рие, и я́ко кри́н благово́нный. Сего́ ра́ди то́чиши ми́ро благово́нное, твоя́ ко́сти оби́льно уха́ют жи́знь: по́лны бо лани́ты твоя́, я́ко ча́ши, арома́т показа́шася.

Дне́сь с на́ми собо́р по́стников и преподо́бных весели́тся, патриа́рхов и проро́ков в па́мяти твое́й, блаже́нне, спра́зднуют на́м апо́столи и му́ченицы, с ни́миже помина́й чту́щих тя́ ве́рно, досточу́дне.

Ра́ка, иде́же честно́е и многострада́льное те́ло твое́ лежи́т, чуде́с благода́ть на́м источа́ет, о́тче Григо́рие, освяща́ющи на́ша ду́ши и телеса́, обогати́вшихся тобо́ю и предста́теля и те́пла тя́ засту́пника иму́щих.

Богоро́дичен: Гла́с Тебе́ Гаврии́лов, ве́рнии, ра́достно провещава́ем: ра́дуйся, раю́, Жи́зни дре́во прозя́бший. Ра́дуйся, реше́ние кля́твы, му́чеников венча́ние, преподо́бных похвало́ и челове́ков благочести́вых утвержде́ние.

Свети́лен.

Святы́ни хра́м бы́л еси́, иера́рше, по Боже́ственному же прича́стию ны́не бо́г быва́еши и рая́ граждани́н, в не́мже напитава́ешися невозбра́нно дре́ва зна́ния и нетле́нныя сла́вы, па́мять творя́, Григо́рие му́дре, о и́же от любве́ ве́рою хва́лящих тя́, свяще́нный о́тче.

Сла́ва, и ны́не: Де́нь предпра́зднственный хра́м приво́дит ны́не пречи́стым введе́нием Богоро́дицы Мари́и, Ю́же пою́т а́нгели, и челове́цы ублажа́ют, де́вы же провожда́ют, свещи́ нося́ще и игра́юще, в хра́м Госпо́день.