Храм Святителя Николая

+7 (962) 551-56-66

Пе́снь 1.

Ирмо́с: Коня́ и вса́дника в мо́ре Чермно́е сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Благода́тию испо́лнен, ра́дости мою́ испо́лни ду́шу, похвали́ти житие́ твое́, Али́пие, и жи́тельство, и́миже вся́ а́нгелы возвесели́л еси́, подвиза́вся.

Я́ко друга́го тя́ Самуи́ла Бо́г освяти́ из ма́терняго чре́ва, Али́пие блаже́нне, и зре́ти пре́дняя я́ко проро́ка Боже́ственна соде́я тя́, достосла́вне.

Я́ко да Бо́г яви́т твою́ све́тлость, ю́же напосле́док име́л еси́, до́бре подвиза́вся, све́та Боже́ственнаго испо́лни, тебе́ ро́ждшуся, преподо́бне, хра́мину па́че ума́.

Богоро́дичен: Рече́ние проро́ка честна́го коне́ц прия́т: се́ бо Де́ва пло́тию Бо́га роди́, челове́ки воззи́ждуща, сокруше́нныя пре́жде грехми́ и прегреше́нии.

Пе́снь 3.

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Я́ко свети́льник на све́щнице, дея́ния лу́чшаго возложе́н, светоза́рными твои́ми, о́тче, доброде́тельми вся́ку ду́шу, ве́рно к тебе́ приходя́щую, благочестному́дренно просвети́л еси́, тмы́ греха́ избавля́я.

Ума́ твоего́ свяще́нная движе́ния творя́ к соблюде́нию Боже́ственных зако́нов Ду́ха, а́нгел яви́лся еси́ на земли́, а́нгельское жи́тельство с пло́тию восприе́м, о́тче богоно́се Али́пие.

Разу́мно пли́щей жите́йских, Али́пие, отше́льник яви́лся еси́ и приступи́л еси́ к три́знам по́стническаго пребыва́ния усе́рдно, твое́ се́рдце жили́ще явля́я Ду́ха, преподо́бне.

Богоро́дичен: Де́во Чи́стая, Сло́ва пала́та, ду́шу мою́ покажи́ до́м Ду́ха и водо́ю исто́чника живонача́льнаго напо́й мя́, зно́ем греха́ пали́маго, я́ко да по до́лгу сла́влю Тя́.

Седа́лен, гла́с 4.

Све́тлостию ве́ры и де́тельным све́том яви́лся еси́ равноа́нгелен на земли́ вои́стинну, Али́пие преподо́бне, показа́л еси́ му́жественно кре́пкое ра́зума твоего́, победи́в ополче́ния стра́стная посто́м. Те́мже и по кончи́не, я́ко жи́в сы́й, моли́ спасти́ся на́м.

Богоро́дичен: Де́во Всенепоро́чная, Я́же Пресу́щнаго Бо́га ро́ждшая, со безпло́тными Того́ непреста́нно моли́ оставле́ние прегреше́ний и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, еди́на Всепе́тая.

Крестобогоро́дичен: Де́во Пренепоро́чная, Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ние прегреше́ний на́м дарова́ти.

Пе́снь 4.

Ирмо́с: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Любо́вь и́стинную и милосе́рдие, ве́ру и наде́жду тве́рду и жи́тельство нельсти́вое прие́мь, о́тче, уго́дник Христо́в бы́л еси́.

Стоя́ на столпе́, непрекло́нен проти́вными прило́ги, де́монов по́лк победи́л еси́ и коле́блемым бы́л еси́, всеблаже́нне, незы́бленное утвержде́ние.

Во́д Боже́ственных испо́лнен бы́в, и ороси́л еси́ ду́ши, иста́явшия зно́ем лю́таго греха́, Али́пие богому́дре, всебога́те.

Яви́лся еси́ стра́шен и непристу́пен де́моном все́м вои́стинну, ураня́я сия́ ра́ною свяще́нных твои́х моли́тв и дале́че отгоня́я, Али́пие.

Богоро́дичен: Стра́сти души́ моея́ исцели́ и просвети́ у́м и се́рдце мое́, Влады́чице, Светода́теля ро́ждши Христа́, преблага́го Бо́га.

Пе́снь 5.

Ирмо́с: Одея́йся све́том, я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Ве́сь возложи́вся Вседержи́телю, ле́тным стоя́нием без покро́ва, о́тче, дожде́м и зно́ем зе́льно стражда́, усе́рдно претерпе́л еси́.

В пе́снех и мольба́х упражня́яся, преподо́бне, Трисо́лнечныя Зари́ благода́ть ума́ чистото́ю прия́л еси́ и све́т целе́ний возблиста́л еси́.

Те́ло твое́ на столпе́ огради́в, умо́м ше́ствовати невозбра́нно к тебе́ Жела́емому, о́тче, попусти́л еси́, све́та исполня́емь.

Богоро́дичен: Свята́го родила́ еси́ Бо́га, бы́вша Челове́ка за милосе́рдие, Свята́я Отрокови́це, освяща́ющаго и́же Того́ ве́рою и стра́хом освяща́ющия.

Пе́снь 6.

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя, я́ко Благоутро́бен.

Ка́мением тя́ ду́си зло́бы бию́ще я́ве, творя́ща стоя́ние на столпе́, я́ко тве́рдаго ка́мене, ника́коже поколеба́ша.

Терпя́, преподо́бне, претерпе́л еси́, терпе́ние тебе́ и́стинное Го́споду дарова́вшу и от все́х неудо́бных тя́ изба́вившу.

Пресла́вно, преподо́бне, све́т ви́ден бы́сть вы́ше столпа́, на вся́к де́нь просвеща́ющь твоя́, чудотво́рче, душе́вная чу́вства.

Богоро́дичен: Кре́пко Тя́ утеше́ние су́щии в ско́рби, и прибе́жище, и изве́стное вси́ и́мамы заступле́ние, Богоро́дице: спаси́ от бе́д рабы́ Твоя́.

Конда́к, гла́с 8.

Я́ко доброде́телей вину́ и по́стников удобре́ние, Це́рковь сла́вит тя́ дне́сь и воспева́ет, Али́пие: моли́твами твои́ми пода́ждь чту́щим любо́вию до́блести твоя́ и боре́ния лю́тых прегреше́ний избавле́ние, я́ко тезоимени́тый.

И́кос:

Али́пиеву житию́ боже́ственному и равноа́нгельному, прииди́те, почуди́мся, архиере́и свяще́нницы, и мона́шествующии, и вси́ лю́дие богому́дрии, и подража́им дея́ния его́, да и того́ ча́сти сподо́бимся мольба́ми его́, празднолю́бцы, и́бо то́й небе́сную пе́снь пое́т безпеча́льно Бо́гу, я́ко тезоимени́тый.

Пе́снь 7.

Ирмо́с: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́.

Терпели́вейший и кре́пкий Али́пий, ле́ты мно́гими зимо́ю дручи́мь, Ду́ха теплото́ю гре́яшеся пресла́вно.

К высоте́ небе́сней име́я жи́тельство, о телеси́ небре́гл еси́, я́ко растле́тися иму́щем, и тому́, согнива́ему, неради́л еси́ о боле́знех.

Вся́каго сладостра́стия, о́тче, отве́ргся, с зимо́ю и ва́ром боря́ся, пострада́л еси́, безпокро́вен, поя́: благослове́н Бо́г оте́ц на́ших.

Богоро́дичен: Непостижи́мый пло́ть прия́т, у́мну же и одушевле́нну, из Тебе́, Присноде́во, е́же спасти́ пою́щия: Бо́же, благослове́н еси́.

Пе́снь 8.

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.

Но́вый Самуи́л, предзря́ бу́дущее ума́ чистото́ю, яви́лся еси́, Али́пие, все́м предглаго́ля, я́ко Бо́жий проро́к, от Го́спода явля́емая тебе́, о́тче.

Светови́дный Це́ркве сто́лп, забра́ло незы́бленное, стена́ неруши́мая все́х челове́ков, Бо́гу ве́ровавших, Христо́в уго́дник Али́пий да почти́тся.

Усну́л еси́ до́бре сно́м пра́ведным, о́тче, все́м до́лжным, успи́в пре́жде стра́сти многообра́зныя мольба́ми и бде́нии. Те́мже, неусы́пна тя́ предста́теля иму́ще ны́не, обогати́хомся.

Богоро́дичен: Твое́ Рождество́ роди́вшийся гре́х зло́бою змии́ною обезпло́дстви ны́не, еди́на кля́твы потреби́тельница, Де́во. Те́мже Тя́ чти́м во вся́ ве́ки.

Пе́снь 9.

Ирмо́с: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем.

Свяще́нное житие́ твое́ от пеле́н яви́ся Христу́, сия́я доброде́тельным све́том, блаже́нне, честна́ же твоя́ сме́рть пред Бо́гом бы́сть, о́тче Али́пие, мона́шествующих нача́льниче.

Яко свети́ло пресве́тлое, просвеща́еши всю́ зе́млю, отгоня́ лука́выя стра́сти, и разреша́я тму́ грехо́вную, и просвеща́я Боже́ственными светлостьми́ исцеле́ний пою́щия тя́.

Стоя́ние на столпе́ сотвори́л еси́ ле́та, му́дре, пятьдеся́т к тре́м, я́ко страда́лец стражда́ усе́рднейше, и зимо́ю, и мра́зом, и зно́ем, о́тче, неосла́бно дручи́мь.

Свята́я твоя́ па́мять Ду́хом Святы́м на́с освяща́ет, му́дре, сию́ свяще́нно соверша́ющия и ве́рою тя́ воспева́ющия, о́тче, в не́й я́ко засту́пника и предста́теля ду́ш на́ших.

Богоро́дичен: Просвеще́ние мне́ да́руй, во тме́ су́щу страсте́й, окая́нному и гре́шному, и изба́ви мя́ лука́вых де́л и пла́мене, предлежа́щаго ми́, Пречи́стая Влады́чице, Предста́тельнице пою́щих Тя́.

Свети́лен.

По́двиги па́че челове́ка проше́л еси́, о́тче преподо́бне, Христо́вою си́лою: пятьдеся́т бо к тре́м ле́том на столпе́ стоя́л еси́, му́дре Али́пие, отвсю́ду дручи́мь, и ны́не коне́чное, блаже́нне, благи́х все́х обре́л еси́.

Богоро́дичен: Ты́ моя́ предста́тельница, Чи́стая, и тве́рдое прибе́жище, Ты́ моя́ засту́пница и покро́в, и, к Тебе́ припа́дая, зову́: боле́зней мои́х изба́ви мя́, я́ко все́х преиму́щи, и огня́ мя исхити́ ве́чнующаго, Де́во, на Тя́ упова́ющаго.